సనాతన ధర్మ పరిరక్షణకు పదేళ్లుగా విశేష కృషి: ఈర్ల రాజు ముదిరాజ్

గో సేవ ధర్మ పరిరక్షణలో రాజస్థానీ మార్వాడి మిత్రుల సేవలు అభినందనీయం

తెలంగాణ అడ్డా ప్రతినిధి అమీన్పూర్

సంగారెడ్డి జిల్లా అమీన్పూర్ మండలం బీరంగూడ డివిజన్ పరిధిలోని శ్రీ భ్రమరాంబిక మల్లికార్జున గోశాలలో రాజస్థానీ గేర్ మండల్ ఆధ్వర్యంలో నిర్వహించిన దుర్గామాత నవరాత్రి ఉత్సవాల ముగింపు కార్యక్రమం భక్తిశ్రద్ధలతో జరిగింది. ఈ కార్యక్రమానికి బీరంగూడ డివిజన్ భారతీయ జనతా పార్టీ అధ్యక్షుడు ఈర్ల రాజు ముదిరాజ్ ముఖ్య అతిథిగా హాజరయ్యారు. ఈ సందర్భంగా దుర్గామాత అమ్మవారిని దర్శించుకుని ప్రత్యేక పూజల్లో పాల్గొన్నారు. రాజస్థానీ మార్వాడీ మిత్రులకు, మహిళా సోదరీమణులకు, వారి కుటుంబ సభ్యులకు విజయదశమి పర్వదిన శుభాకాంక్షలు తెలియజేశారు.

సనాతన ధర్మ పరిరక్షణకు పదేళ్లుగా కృషి

ఈ సందర్భంగా ఈర్ల రాజు ముదిరాజ్ మాట్లాడుతూ.. ఈ ప్రాంతంలో గత పదేళ్లుగా రాజస్థానీ మార్వాడీ మిత్రులు నవరాత్రి, దీపావళి తదితర పర్వదినాలను భక్తిశ్రద్ధలతో ఘనంగా నిర్వహిస్తూ సనాతన ధర్మ పరిరక్షణకు, గోమాత రక్షణకు చేస్తున్న సేవలు అభినందనీయమని అన్నారు. తమ సమయాన్ని, శ్రమను, ఆర్థిక వనరులను వెచ్చిస్తూ ఆధ్యాత్మిక కార్యక్రమాలను నిర్వహించడం సంతోషకరమని పేర్కొన్నారు.

గోమాతను గౌరవించడం, గోసేవ చేయడం, భారతీయ సంస్కృతి సంప్రదాయాలను భావితరాలకు అందించడం ప్రతి ఒక్కరి బాధ్యత అని తెలిపారు. ఇలాంటి ధార్మిక కార్యక్రమాల ద్వారా ప్రజల్లో ఆధ్యాత్మిక చింతన, సేవాభావం, ఐకమత్యం పెంపొందుతాయని అన్నారు.

ధర్మ పరిరక్షణకు సహకారం

సనాతన ధర్మ పరిరక్షణ, గోమాత రక్షణ, హిందూ సంస్కృతి సంప్రదాయాల పరిరక్షణకు తాను ఎల్లప్పుడూ తనవంతు సహాయ సహకారాలు అందిస్తానని ఈర్ల రాజు ముదిరాజ్ స్పష్టం చేశారు. ధార్మిక కార్యక్రమాలను నిర్వహించే వారు పరస్పర సహకారంతో ముందుకు సాగాలని, సమాజంలో సోదరభావం, సేవాభావం పెంపొందించేందుకు ప్రతి ఒక్కరూ కృషి చేయాలని పిలుపునిచ్చారు.

విజయదశమి శుభాకాంక్షలు

విజయదశమి పర్వదినం ప్రజల జీవితాల్లో విజయాలు, సుఖసంతోషాలు నింపాలని, దుర్గామాత అమ్మవారి కృపాకటాక్షాలు ప్రతి కుటుంబంపై ఉండాలని ఆకాంక్షించారు. ప్రజలందరికీ ఆయురారోగ్యాలు, ఐశ్వర్యం, శాంతి, సౌభాగ్యాలు కలగాలని కోరుకున్నారు.

ఈ కార్యక్రమంలో పరమేష్, దీపక్, రాకేష్, రతన్, రాజు తదితర రాజస్థానీ మార్వాడీ మిత్రులు, మహిళలు, గోమాత ప్రేమికులు, భక్తులు పాల్గొన్నారు.